სათემო განვითარების ცენტრი მრავალი წელია მუშაობს კახეთის რეგიონში ხალხური რეწვის სოციალური
საწარმოების განვითარებისათვის. ორგანიზაციის პარტნიორი სახელოსნოები ნუკრიანსა
და ნაფარეულში მრავალფეროვან პროდუქციას აწარმოებენ. ერთობლივი ძალისხმევით სისტემატიურად
ხდება ახალი თემატური მიმართულების დამუშავება.
2013-2014 წლებში, სათემო განვითარების ცენტრის ინიციატივით, ექსკლუზიურად ნუკრიანისა და
ნაფარეულის სახელოსნოებისათვის შეიქმნა ქართული ანბანის მხატვრულ-დეკორაციული ვერსია.
ანბანის ცალკეული ასოს გამოყენება ხდება ხალხური რეწვის და სხვა პროდუქციის (თექა, ტექსტილი,
მინანქარი, ქსოვა, ქარგვა, კერამიკა) წარმოების პროცესში - ორნამენტის სახით. ამით სახელოსნოები
ქართული ანბანის პოპულარიზაციას უწყობენ ხელს.
აღსანიშნავია, რომ 2015 წელს კულტურული მემკვიდრეობის დაცვის ეროვნული სააგენტოს მიერ
„ქართული ანბანის სამი სახეობის ცოცხალ კულტურას~ - ასომთავრული, ნუსხური და მხედრული
დამწერლობის თანაარსებობის უწყვეტ ტრადიციას - არამატერიალური კულტურული მემკვიდრეობის
ძეგლის სტატუსი მიენიჭა.
წინამდებარე კატალოგში წარმოდგენილია ქართული ანბანის სამი მხატვრული ვერსია: თანამედროვე,
ძველი (ასომთავრული) ანბანის და ქართული ორნამენტის მხატვრული კომპოზიციის სახით.